"Рома" бош мураббийи Жозе Моуриньо А Сериянинг 13-турида "Удинезе" устидан қозонилган ғалабадан сўнг (3:1) нима учун Сердар Азмунни бошқа ҳужумчилар қатори асосий таркибда майдонга туширмаётганини тушунтирди.

"Дибала ва Азмун ҳимояда унчалик тартибли ва уюшқоқ эмаслигини инобатга олсак, бу маълум бир номутаносибликка олиб келади. Биттаси ўйнаса, жамоа мувозанатига путур етмайди, лекин майдонда иккита бўлса, назоратни йўқотиш хавфи бор. Менга Азмуннинг ўйнаши ёқади, аммо ҳимояга ўтишда у менинг ўйинчим бўладиган сифатга эга эмас. Бироқ, у ажойиб маҳоратга эга", - деди Моуриньо матбуот хизматига.