Ўзбекистон терма жамоаси ва Киевнинг «Арсенал» клуби собиқ ҳужумчиси Максим Шацкихи фаолиятини Одессанинг «Черноморец» клубида давом эттирадиган бўлди. Бу ҳақда клуб расмий сайти хабар тарқатди.
Манбанинг маълум қилишича, Шацких янги клуби билан 2.5 йилга мўлжалланган шартнома имзолади. 2011 йилда Украина фуқаролигини олган футболчи шартномага имзо чеккани заҳоти «денгизчилар»нинг йиғинида иштирок этиш учун Туркияга жўнаб кетди.
Эслатиб ўтамиз, олдинроқ «Арсенал»да юзага келган оғир молиявий муаммолар сабаб турли футболчилар трансферга қўйилган. Шацких ҳам жамоани тарк этмоқчи экани ҳақида гапириб ўтганди.
