Испания терма жамоаси бош мураббийи Луис де ла Фуэнте Браим Диаснинг қайси терма жамоани танлаши мумкинлиги ҳақида гапирди.
24 ёшли ярим ҳимоячи "Реал Мадрид"нинг асосий таркибига кириб олди ва "Лос Бланкос" учун сўнгги тўртта ўйинда иккита гол урди ва битта голли узатмани амалга оширди. Диас Испания терма жамоасида атиги бир марта ўйнади (2021 йилда), шунинг учун у спорт фуқаролигини ўзгартириш ҳуқуқига эга - ярим ҳимоячида Марокаш терма жамоасида ўйнаш ҳуқуқи ҳам бор.
"Бу масалада асосийси футболчининг ўз хоҳиши. Браим Испания терма жамоасида ўйнамоқчи. У испаниялик ва унинг "Реал Мадрид"даги ўйинларидан мамнунман", - деди де ла Фуэнте Диаснинг терма жамоага таклиф қилиниши ҳақидаги саволга жавоб берар экан.
