Ўтган мавсумда Корея футбол ассосиацияси кубогини қўлга киритган «Поханг Стилерс» футболчилари жамланган автобус 16 январь куни автоҳалокатга учради. Хабарингиз бор, «пўлатчилар» Осиё чемпионлар лигасининг кейинги мавсумида мамлакатимиз вакили «Бунёдкор»га рақиблик қилади.

«Поханг Стиллерс» матбуот хизмати вакилидан иқтибос келтираркан «Спортс Ханкук» нашри шундай ёзади: «Футболчилар Янгсан шаҳрида 2 кунлик қисқа машғулотларни ўтказиб қайтишаётганда «Поханг Стилерс»га қарашли автобус юк машинаси билан тўқнашиб кетган. Футболчилар орасида жарохат олганлар йўқ, аммо автобус ҳайдовчиси касалхонага жўнатилган».

Бош мураббий Хванг Сон Хонг: «Оғир жароҳат олганлар йўқ. Футболчиларга уйларига боргач, бирор жойлари оғриса, дарҳол хабар беришларини тайинладик», дея гапирган бўлса, жамоа ҳужумчиси Но Бёнг Жун ўз шахсий интернет сахифасида: «Фақатгина автобус «яраланди». Умид қиламанки, келаётган мавсумдаги барча омадсизликлар шунга урган бўлсин», дея ёзади. «Пўлатчилар» ўша жойнинг ўзида сайёҳлик компаниясига қарашли автобусни ижарага олиб, ўз қароргоҳларига етиб олишган.

Эслатиб ўтамиз, «пўлатчилар» 20 январь куни Анталияга парвоз қилишади ва бир неча кун давомида янги мавсум тадоригини кўришади.

Отабек Йўлдошев, Жанубий Корея, Сеул.