"Australian open"да иштирок этаётган Ўзбекистоннинг биринчи ракеткаси Денис Истомин, бугун иккинчи даврадаги ўйинини ўтказди. Унга мусобақанинг 21-сараланган теннисчиси, италиялик Андреас Сеппи рақиблик қилди.

Баҳс ўта қизиқарли кечди ва 5 сет давом этди. Беш сетдан 3таси эса тай-брекккача етиб борди. Биринчи сетда италиялик теннисчи тай-брекни ўз фойдасига ҳал қилди (4:7). Иккинчи сетда ҳамюртимиз ишни тай-бреккача чўзмасликнинг иложини топди — 7:5.

Учинчи сетда эса Денис тай-брекда ғолиб чиқди (7:3) ва сетлар бўйича ҳисобни ўз томонига оғдирди. Тўртинчи сетда Истомин ўйин тақдирини ўз фойдасига ҳал қилиши мумкин эди, аммо бу галги "лоторея"да омад Сеппига кулиб боқди (3:7).

Ҳал қилувчи сетда эса ўзбекистонлик теннисчи жисмоний жиҳатдан чарчаб қолди шекилли, сетни 2:6 ҳисобида бой бериб қўйди.

Денис Истомин ўтган йили "Australian open"ни биринчи босқичдан кейин тарк этганди. Бу сафар эса 2-даврадан сўнг курашдан чиқди. Ҳамюртимиз ўз ҳисобига 45 рейтинг очкоси ва 45.500 доллар мукофот фондига эга бўлди.