Ўзбекистондаги ҳар бир футбол мухлисига Рустам Акрамов номи жуда яхши таниш. Профессор Акрамовнинг футболдаги ёрқин фаолияти ҳақида ортиқча тўхталиш шарт бўлмаса керак. Айнан унинг мураббийлигида Ўзбекистон миллий терма жамоаси 1994 йили Хиросимада бўлиб ўтган Осиё ўйинларида шоҳсупага кўтарилган эди.

Нафақат Ўзбекистонда, балки ҳорижда ҳам ҳам мураббийларни тайёрлаш ва лицензиялаш бўйича катта ном қозонган мутахассиснинг бу соҳада қўлга киритган ютуқлари талайгина. Бир неча йиллардан бери ФИФА ҳамда ОФК инструктори сифатида фаолият кўрсатиб келаётган Рустам Акрамов 2010 йилда Осиё Футбол Конфедерацияси томонидан Осиё футболи ривожига қўшган ҳиссаси учун «Олдин Юлдуз» мукофоти билан тақдирланди.

Республикамиздаги жуда кўплаб мураббийларнинг устози ҳисобланадиган Рустам Акрамовнинг шу кунлалрда янги - «Самимий футболга ишонч билан» («С верой в искренний футбол») номли китоби дунё юзини кўрди. Мазкур китобда муаллиф ўзининг илмий ва амалий ишлари, жаҳон чемпионатлари, Европа ва Осиё чемпионатлари якунларига бағишланган таҳлилий мақолаларини чоп этган. Шунингдек, мазкур китобдан профессионал жамоа мураббийлари учун жисмоний тайёргарлик бўйича қўлланмалар жой олган. Ўзбек ва Осиё футболи ҳақида энг долзарб интервьюлар, терма жамоалар тайёргарлиги ва иштирокига бағишланган маъқолалардан парчалар эса, футболга бефарқ бўлмаган ҳар қандай мухлис ёки мутахассисда катта қизиқиш уйғотиши табиий. Ушбу китоб кенг ўқувчилар оммасига мўлжалланган бўлиб, талабалар, мураббийлар ва футбол мутахассислари учун ажойиб қўлланма вазифасини ўтаб беради.

«Самимий футболга ишонч билан» номли китобнинг асосий ютуғи шундаки, унда муаллиф ҳозирги кун футболига тегишли энг долзарб мавзуларни кўтариб чиққан. Шу билан бирга, футбол мутасаддиларини, мураббийларини, футболчилар, мухлислар ва умуман футбол оламида фаолият юритаётган ҳар бир инсонни миллионлар ўйинига ёпишиб олган негатив омиллар - келишилган ўйинлар, ўйин ва ўйинчиларни сотиб олиш, тотализатор каби иллатларга қарши биргаликда курашиш кераклиги таъкидланган.