Янги мавсумни биринчи лигада ўтказадиган "Андижон" клуби мавсумга тайёргарлик кўришни пойтахтда бошлади. Азамат Абдураимов бошчилигидаги жамоа бугун дастлаб тиббий кўрикдан ўтишган бўлса, куннинг иккинчи ярмида дастлабки машғулот жараёнларини ўтказишди.

— Жамоамизни икки гуруҳга бўлинган ҳолда машғулотларни олиб боришни ўйлаб турибмиз. Ўқув-машғулот жараёнида 23 январь куни 1 гуруҳимиз "Шахтёр" (Қарағанда) билан, иккинчи гуруҳимиз "Бунёдкор" жамоаси билан ўртоқлик учрашуви ўтказасак, 27 январь куни "Оқтепа" ва "Пахтакор" ёшларига қарши ўртоқлик учрашуви ўтказишни режалаштирганмиз, — дейди жамоа бош мураббийи Азамат Абдураимов.

Клуб мураббийлари биринчи йиғинда асосан футболчиларнинг жисмоний ҳолатини яхшилаш машғулотларига эътибор беришмоқда. Шу сабабли ҳам футболчилар дастлабки йиғинда асосан югуриш ва енгил машқларни амалга оширишди. Бош мураббийниг сўзларига кўра Биринчи лига баҳслари бошлангунга қадар клуби яна икки бор ўқув-йиғинини ташкил этишни мақсад қилган.

— Биринчи йиғинимиз 28 январга қадар давом этса, февраль ойининг илк кунларида Андижонда йиғиламиз. Шундан сўнг 3 февралдан бошлаб яна Тошкентга ўқув йиғинига келамиз. Иккинчи йиғинда бир вақтнинг ўзида ПФЛ Кубогида ҳам иштирок этамиз, — дейди Азамат Биродарович. — Сўнгги йиғинни март ойида ўтказишни кўзлаб турибмиз. Айнан иккинчи ва учинчи йиғинларда жамоага керакли бўлган футболчиларни аниқлаб оламиз.

28 январга қадар давом этадиган ўқув-йиғин машғулотлар жараёнида асосан маҳаллий футболчилар иштирок этишмоқда.