АПЛ 15-турида "Тоттенхэм" "Вест Хэм"га енгилди - 1:2.
"Football Tweet" хабарига кўра, "Тоттенхэм" 2008 йилдан бери биринчи марта ўз уйида кетма-кет учта ўйинда мағлуб бўлди.
Аввалроқ, Анге Постекоглу шогирдлари ўз майдонида "Астон Вилла" (1:2) ва "Челси"га (1:4) мағлуб бўлганди. Эътиборлиси, ҳар учала ҳолатда ҳам жамоа биринчи бўлиб гол урди – бу Премьер-лигадаги антирекорд ҳисобланади.
Эслатиб ўтамиз, атиги беш тур олдин “Тоттенхэм” 30 очкодан 26 очко тўплаган ҳолда турнир жадвалида пешқадамлик қилаётганди. “Шпорлар” айни дамда 27 очко билан бешинчи ўринда бормоқда ва пешқадам “Арсенал”дан 9 очко ортда қолмоқда.
