Туриннинг "Ювентус" клуби қишки трансферлар вақтида "Шахтёр" ярим ҳимоячиси Георгий Судаковни ўз сафига қўшиб олишга уриниб кўради, деб хабар беради TuttoJuve нашри.
Манбага кўра, 21 ёшли украиналик футболчининг трансфери агар Донецк клуби унинг учун 25 миллион евродан кўпроқ сўрамаса, амалга ошиши мумкин.
Туринликлар ўйинчини сотиб олиш имконияти билан ижарага олмоқчи, аммо улар мажбурий сотиб олиш шарти билан ижарага ҳам рози бўлишлари мумкин.
Аввалроқ “Ювентус” Судаков учун 10-15 миллион евро таклиф қилиш имкониятини кўриб чиқаётгани ҳақида хабар берилганди. Футболчи жорий мавсум “Шахтёр” сафида барча мусобақаларда 17 та ўйинда майдонга тушди. Унинг ҳисобида учта гол ва битта голли узатма бор.
Аввалроқ, футболчини Лондоннинг “Арсенал”, Португалиянинг “Бенфика”, “Брайтон” ва Лондоннинг “Челси” клублари скаутлари кузатаётгани хабар қилинганди.
