14 январь куни “Бунёдкор” ёшлари билан ўтган баҳсдан сўнг, "Олмалиқ" жамоаси аъзоларига икки кун дам берилди.

“Ўзбекистон” меҳмонхонасида истиқомат қилаётган олмалиқликлар таркибида айни дамда 38 нафар футболчи машғулотларда иштирок этмоқда. “Бунёдкор” ёшлари билан ўтган учрашувда жамоамиз 32 нафар футболчини майдонга туширди. Ҳар бир тайм бир соатдан ўтказилган ўйинда рақиб дарвозаси етти марта ишғол этилди. Дастлабки таймда Зоҳир Пиримов, Самандар Шодмонов ва Сухроб Бердиев гол урган бўлса, иккинчи таймда Исроил Эргашев, Александр Лупашко, Мўйдин Мамазулумов ва Зафар Полвоновлар зафар қучишди. Ўйиндан сўнг, қозоғистонлик Фозилбек Бекбанов, дарвозабон Дониёр Усмонов ва ҳимоячи Шавкат Раимқуловга жавоб берилди.

17 январдан бошланган йиғинда жамоа билан шартнома тузган ҳимоячи Акмал Рустамов ва ярим ҳимоячи Шерали Жўраев таркибдан жой олди. Ҳар иккала футболчи ўтган мавсумни “Қизилқум” таркибида ўтказган. Шунингдек, жамоада кўрикдан ўтиш учун “Бунёдкор”дан Виктор Мочалов ва Азиз Ғуломхўжаев машғулотларда қатнашмоқда. Булардан ташқари яна бир қатор ёш футболчилар ҳам “Олмалиқ” таркибида шуғулланмоқда. Кўрикдан ўтаётганларнинг жамоада қолиш ёки қолмаслиги 29 январга қадар ўтказиладиган ўртоқлик ўйинларидан сўнг маълум бўлади. Жамоа бугун “Қизилқум” билан назорат баҳсини ўтказади. 22 январь куни “Шахтёр” (Қарағанда) ўринбосарлари, 23 январда “Андижон”, 25 январда “Бухоро”, 27 январда “Динамо” ва 29 январда “Металлург” жамоалари билан ҳам назорат ўйинлари ташкиллаштирилади.