2012 йил 18 декабрда Вазирлар Маҳкамаси томонидан Ўзбекистонда аёллар футболини ривожлантиришга қаратилган фармойиш чиққанди. Унга кўра айни пайтда Ўзбекистон профессионал лигасида иштирок этаётган Олий лиганинг барча 14та клуби қошида аёллар футбол жамоаларини ташкил этиш кўзда тутилган. Фармойишнинг ижросини таъминлаш мақсадида «Локомотив» профессионал футбол клуби дастлабки қадамни ташлади.

Клуб маъмурияти юртимизда аёллар футболини ривожлантиришда жонбозлик кўрсатиб келаётган фидоий инсон, спорт устаси, Осиё чемпиони, айни пайтда мамлакат ўсмир-қизлар (U-16) жамоасини бошқариб келаётган Гулнора Аъзамова билан ўзаро келишувга эришди. Гулнора Эргашевна шу кунгача «Чирчиқ» жамоасида ҳам ўйновчи мураббий сифатида фаолият кўрсатиб келаётган эди. Эндиликда ушбу жамоа базасида «Локомотив-Women» жамоаси ташкил этилди. Янги тузилган жамоа футзал бўйича Ўзбекистон IX миллий чемпионатида иштирок этишга ҳам улгурди.