Ҳамдўстлик кубогида энди икки тур ўйинлари якунланган бўлса-да, унда кўпчилик мутахассисларнинг эътиборини ўзига жалб қилишга улгурган футблочилардан бири Жамшид Искандеров бўлади. Ўзбекистон ёшлар терма жамоаси истиқомат қилаётган Санкт-Петербургдаги меҳмонхонага ташриф буюриб, Жамшид билан қисқача суҳбатлашишга муваффақ бўлдик.
"Қозоғистон билан ўйиннинг биринчи бўлими қийин бўлди. Дастлабки 45 дақиқаликни рақибни ўрганишга сарфладик, десак ҳам бўлади. Биринчи бўлимда ҳар иккала жамоа бир-биридан эҳтиёткор бўлиб ўйнади", дейди Жамшид биз билан суҳбатда. "Иккинчи бўлимда эса ўзимизга келиб олдик ва гол уришга муваффақ бўлдик. Ана шундан кейин эса нафақат ҳисобни ушлаб қолдик, балки рақиб дарвоза томон янада кўпроқ босим уюштирдик".
Терма жамоамиз мусобақадаги ҳар иккала ўйинда ёмон ҳаракат қилмади. Мусобақа мезбони билан ўйинда ёшларимиз дуранг ўйнаган бўлсалар-да, ўйин сўнгида ғалаба тўпини киритишлари ҳам мумкин эди. Қозоғистонга қарши кечган кескин ўйинда эса вакилларимиз айнан Искандеровнинг чиройли голи эвазига зафар қучишди. Жамшиднинг фикрича, иккинчи ўйин терма жамоамиз учун қийинроқ ўтган.
"Россия ва Қозоғистон терма жамоаларини таққослайдиган бўлсам, иккала жамоа ҳам кучли эканини таъкидлашим мумкин. Аммо Қозоғистон билан ўйиннинг биринчи бўлими биз учун қийинроқ ўтди", дейди футболчи.
Жамшид ўз устида ишлашда давом этса, кейинчалик унда хориж клубларида ўйнаш имконияти бор. Унда замонавий футбол учун керак бўлган диспетчерлик қобилияти, аниқ паслар билан жамоадошларини таъминлаш иқтидори бор.
"Ҳозирча қайсидир чемпионат ёки қайсидир хориж жамоасида ўйнайман, дея олмайман. Ҳали ёшман ва футболчи сифатида ўсишим керак. Футболчиликни энди бошлаётган пайтимда "Пахтакор"да ўйнашни орзу қилардим. Минг қатла шукр, ҳозирда ўзим истаган жамоада ўйнамоқдаман. Ҳозирги кунда эса "Барселона" жамоасига мухлислик қиламан. Бу жамоада ким ўйнашни истамайди дейсиз", дейди ярим ҳимоячи.
Санкт-Петербургда мухлисларимиз спорт мажмуасига келиб, терма жамоамизни ўйин давомида қизғин қўллаб-қувватлаб туришибди. Бу ҳам футболчиларга қўшимча куч ва қўшимча далда бўляпти.
"Бизни қўллаб-қувватлаб турган мухлисларга миннатдорчилик билдираман. Улар бор экан, биз фақат ғалаба учун ўйнаймиз. Уларнинг қўллаб-қувватлашини яхши ҳис қиламиз, улар туфайли олдинга интиламиз", дейди ярим ҳимоячи.
Дилмурод. Санкт-Петербург.
