"Кёльн" стадионида пиротехника воситаларидан фойдаланилгани учун Бундеслига тарихида рекорд даражадаги жаримага тортилди.
Воқеа 22 октябрь куни Бундеслига доирасидаги Мёнхенгладбахнинг "Боруссия"сига қарши ўйинда юз берди. Ўйин бошланишидан олдин "Кёльн" мухлислари трибуналардан бирида пиротехника воситаларидан фаол фойдаланишган, натижада кучли тутун туфайли ўйин бошланиши 6 дақиқага кечиктирилган. Ўйин давомида мухлислар пиротехника воситаларини ёқишда давом этишди.
Германия футбол ассоциацияси (DFB) "Кёльн"ни 595 минг евро жаримага тортди. Шу билан бирга, ушбу маблағнинг 198 минг евросини клуб стадионида хавфсизлик чораларини кучайтиришга йўналтириш мумкин. "Кёльн" матбуот хизмати хабарига кўра, клуб жарима миқдорини камайтириш учун апелляция бериш ниятида.
Express хабарига кўра, "эчкилар" икки баравар кўпроқ жарима олиши мумкин эди, бироқ клуб қоидабузарларни аниқлагани учун сумма камайтирилди.
