Амстердамда Европа Лигаси гуруҳ босқичининг 6-тури ўйини арафасида муштлашган “Аякс” ва АЕКнинг 140 дан ортиқ мухлислари ҳибсга олинди.
NOS нашри хабарига кўра, Нидерландия ва Греция клубларининг мухлислари ўртасида тўқнашув метрода уларнинг поездлари стадионга кетаётганда ёнма-ён тўхтаганидан кейин содир бўлган. Бундан ташқари, шаҳар марказида мухлислар полиция билан тўқнаш келишган.
Воқеалардан сўнг АЕК мухлисларини олиб кетаётган поездларнинг хавфсиз ўтишини таъминлаш мақсадида метро бекати эвакуация қилинди.
Амстердам мэри Фемке Халсеманинг таъкидлашича, бу воқеалар "Аякс" мухлисларига катта завқ бағишлаган қизиқарли футбол оқшомидаги доғ бўлди.
Эслатиб ўтамиз, “Аякс” АЕКни 3:1 ҳисобида мағлуб этиб, 5 очко жамғариб, гуруҳда 3-ўринни эгаллади, бу эса баҳорда Конференциялар лигасида ўйнаш ҳуқуқини беради.
