Amsterdamda Yevropa Ligasi guruh bosqichining 6-turi o‘yini arafasida mushtlashgan “Ayaks” va AYEKning 140 dan ortiq muxlislari hibsga olindi.

NOS nashri xabariga ko‘ra, Niderlandiya va Gresiya klublarining muxlislari o‘rtasida to‘qnashuv metroda ularning poyezdlari stadionga ketayotganda yonma-yon to‘xtaganidan keyin sodir bo‘lgan. Bundan tashqari, shahar markazida muxlislar polisiya bilan to‘qnash kelishgan.

Voqealardan so‘ng AYEK muxlislarini olib ketayotgan poyezdlarning xavfsiz o‘tishini ta’minlash maqsadida metro bekati evakuasiya qilindi.

Amsterdam meri Femke Xalsemaning ta’kidlashicha, bu voqealar "Ayaks" muxlislariga katta zavq bag‘ishlagan qiziqarli futbol oqshomidagi dog‘ bo‘ldi.

Eslatib o‘tamiz, “Ayaks” AYEKni 3:1 hisobida mag‘lub etib, 5 ochko jamg‘arib, guruhda 3-o‘rinni egalladi, bu esa bahorda Konferensiyalar ligasida o‘ynash huquqini beradi.