Франция терма жамоаси ҳужумчиси Жабрил Сиссе Осиё чемпионлар лигаси иштирокчиси, Қатарнинг "Ал-Ғарафа" клубига кўшилди. У Англиянинг "Куинз Парк Ренжерс" клубидан ўтди.

Бу "Ал-Ғарафанинг иккинчи йирик хариди бўлди. Ўтган ҳафтада жамоа "ПСЖ"нинг бразилиялик ҳужумчиси Нене (Андерсон Луис де Карвальо)ни ҳам ўз сафига қўшиб олганди. "Ал-Ғарафа" ОЧЛ-2012нинг гуруҳ босқичида атиги битта ғалабага эришиб, плей-оффга чиқа олмаганди.

31 ёшли Сиссе "Ал-Ғарафа" билан мавсум сўнгига қадар шартнома имзолади. У "КПР" таркибида ушбу мавсумда 21 марта ўйинга тушиб, 4та гол урганди. Ҳужумчи фаолияти давомида "Ливерпуль", "Лацио" ва "Панатинаикос" клубларида ҳам ўйнаган.

"Ал-Ғарафа" ОЧЛ-2013ни мураккаб ўйин билан бошлайди. Улар мусобақанинг ўтган йилги финалчиси — Саудия Арабистонининг "Ал-Аҳли" клуби меҳмони бўлишади. Гуруҳда, шунингдек, Эроннинг "Сепоҳон" клуби ҳам бор. "Локомотив" саралаш баҳсидан ўтиб олса, айнан ушбу гуруҳга қўшилади.