Ливан футбол федерацияси Осиё кубоги-2019 мезбонлиги учун ариза топширишга қарор қилди. Бу ҳақда ташкилот ўз баёнотида маълум қилди.

"Осиё кубоги-2019 мезбонлиги учун тегишли ҳужжатларни тайёрлаш учун ишчи гуруҳ тузилди. Шунингдек, мусобақани ўтказиш учун мамлакатда кенг миқёсдаги ишлар амалга оширилади", дейилади федерация баёнотида.

Ливан футбол федерацияси раҳбари Ҳошим Ҳайдар ўз интервьюсида: "Мусобақани ўтказиш учун хоҳиш билдиришнинг ёмон томони йўқ. Мезбонлик учун даъвогар мамлакатлар кўп. Биз ҳам биринчи босқичда иштирок этамиз. Асосий ишлар эса иккинчи босқичда амалга оширилади. Мезбонлик учун талаблар кучли бўлиши мумкин ва баъзи давлатлар ўз аризаларини қайтариб олишга мажбур бўладилар", дея таъкидлаб ўтди.

Ливан 2000 йили Осиё кубогига мезбонлик қилганди. "Мусобақани ўтказиш учун талаблар йилдан-йилга ўзгариб бормоқда. Биз бу масалада Ливан ҳукумати билан биргаликда якдил бўлишимиз лозим", дейди Ҳайдар.

Баҳрайн футбол ассоциацияси Осиё кубоги-2019 мезбонлиги учун ариза топширганини расман эълон қилди.

Шунингдек, Саудия Арабистони ва БАА мамлакатлари қўшма тарзда, Уммон, Эрон, Ҳиндистон ва Ўзбекистон давлатлари мусобақани ўзларида ўтказиш ниятида эканлигини аввалроқ айтиб ўтишганди. Бу мамлакатларнинг Осиё кубоги-2019 учун ариза топширгани ҳақида ҳозирча аниқ маълумот йўқ.

Эслатиб ўтамиз, 2019 йилги Осиё кубоги мезбонлиги учун аризаларни қабул қилиш 31 январь куни якунига етади.