Михаил Мудрик октябрь ойидан бери илк бор “Челси” сафида рақиб дарвозасини ишғол қилди.

Украина терма жамоаси вингери Англия лига кубоги 1/4 финалидан ўрин олган “Челси” – “Ньюкасл” учрашувининг 92-дақиқасида гол урди. Ҳужумкор ярим ҳимоячи ҳисобни тенглаштирди (1:1), пенальтилар сериясида лондонликлар аниқроқ ҳаракат қилишди – 4:2. Украиналик футболчи ҳам серияда пенальти тепди.

Бу Михаилнинг 21 октябрдан буён "кўклар" учун биринчи голи бўлди. Ўшанда у АПЛ доирасидаги “Арсенал” дарвозасига гол урганди (2:2). Кейин клуб ва терма жамоа сафида 8 ўйинда гол ура олмади.

Жорий мавсумда Мудрик 17 та ўйинда майдонга тушиб, 3 та гол ва 2 та голли узатмага муаллифлик қилган. У “Челси” сафида жами 34 та ўйин ўтказиб, гол+пас тизимидан фойдаланган ҳолда 7 (3+4) очко жамғарган.