Мадриднинг «Реал» клуби дарвозабони Икер Касильяс чап қўлидан олган жароҳати сабаб тахминан икки ой майдонга туша олмаслиги мумкин. Бу ҳақда «Marca» нашри хабар тарқатди.
Кечагина Касильясга панжа суякларининг синиши ташхиси қўйилганди. Бу жароҳатни у Испания кубоги доирасида «Валенсия»га қарши жавоб учрашув пайтида жамоадоши Альваро Арбелоа билан тўқнашиб кетиши натижасида орттириб олганди.
Агар шифокорларнинг дастлабки ташхиси тўғри бўлса, Касильяс Европа чемпионлар лигасининг 1/8 финал «Манчестер Юнайтед»га қарши иккита учрашувни ҳам ўтказиб юборади.
Эслатиб ўтамиз, Касильяс бугун яна бир бор қўшимча текширувлардан ўтади. Шундан кейингина унинг қачон сафга қайтиши муддати аниқ бўлиши мумкин.













