Каталониянинг “Барселона” ва Мексиканинг “Америка” клуби ўртасидаги ўртоқлик учрашуви якунига етди. Учрашув Далласдаги (АҚШ) “Коттон Боул” стадионида бўлиб ўтди ва 3:2 ҳисобида Мексика жамоасининг ғалабаси билан якунланди.
"Барселона"нинг голларига Ламин Ямал ва Марк Гиу муаллифлик қилишди. “Америка” сафида эса Хулиан Киньонес (дубль) ва Энри Мартин гол уришди.
"Барселона" Мексика клуби билан ўйин эвазига тахминан 5 миллион евро ишлаб олиши мумкинлиги аввалроқ хабар қилинганди.
Эслатиб ўтамиз, “Барселона”нинг жароҳат олган Марк-Андре тер Штеген, Иньиго Мартинес, Маркос Алонсо, Гави, Педри ва Рональд Арауходан ташқари барча асосий футболчилари Далласга йўл олишди.
Айни дамда Испания Примерасида ўтказилган 18 учрашувдан сўнг "Барселона" 38 очко билан учинчи ўринда бормоқда.
