Англиянинг “Манчестер Сити” жамоаси Бразилиянинг “Флуминенсе” клубини тор-мор этиб, клублар ўртасида жаҳон чемпионига айланди.

Учрашув “шаҳарликлар”нинг 4:0 ҳисобидаги ғалабаси билан якунланди. Ушбу муваффақиятдан сўнг “Манчестер Сити” клублар ўртасидаги ЖЧ, АПЛ, Чемпионлар Лигаси, Англия Кубоги ва Европа Суперкубогини қўлга киритган илк инглиз клубига айланди.

Клублар ўртасидаги мундиалда кетма-кет 11 марта Европа клуби ғолиб бўлмоқда. Сўнгги бор 2012 йилда “Челси” Бразилиянинг “Коринтианс” жамоасига мағлуб бўлганди. Шундан буён “Реал” 5 марта, “Бавария” 2 марта, “Барселона”, “Ливерпуль”, “Челси” ва “Манчестер Сити”лар бир мартадан ушбу турнирда зафар қучди.

“Шаҳарликлар” ярим ҳимоячиси Родри турнирнинг энг яхши футболчиси деб топилди ва “олтин тўп”га эга чиқди. “Кумуш тўп” унинг жамоадоши Кайл Уокерга топширилди. Кучли учликни “Флуминенсе” ярим ҳимоячиси Жон Арьяс якунлаб берди.

Манчестер клуби бош мураббийи Пеп Гвардиола эса мусобақада рекордчига айланди. Испаниялик мутахассис 4 марта клублар ўртасидаги жаҳон чемпионатида зафар қучмоқда. Бунга қадар “Барселона” (2009, 2011) ва “Бавария” (2013) билан шоҳсупага чиққан эди.

Шунингдек, Гвардиола мураббийлик фаолияти давомида 37-совринини қўлга киритди. Бу борада Пеп Алекс Фергюсондан ортда қолмоқда. “Манчестер Юнайтед”нинг собиқ мураббийи ҳисобида 49 та соврин мавжуд.