Наманган шаҳридаги «Паҳлавон» спорт мажмуасида жорий йилнинг 1-3 февраль кунлари теннис бўйича Дэвис кубоги гуруҳ босқичи беллашувлари бўлиб ўтади. Унда Осиё ва Океания минтақаси биринчи гуруҳидан жой олган Ўзбекистон ва Хитой жамоалари кортда баҳсга киришадилар.

"Туркистон-пресс"нинг хабар беришича, мазкур турнирда иштирок этадиган теннисчилар номи ҳозирданоқ маълум: Ўзбекистон жамоаси дунё теннис таснифида 50-ўринда бораётган Денис Истомин, Фаррух Дўстов (229) ва Сарвар Икромов (560 ) билан кортга чиқса, хитойликлар таркибида Зе Жанг (дунё таснифида 157-ўрин), Ди Ву (186), Мао-Синь Конг (379) ва Же Ли (401) каби теннисчилар ҳамюртларимизга рақиблик қилишади.

Таъкидлаш лозимки, Дэвис кубоги доирасида энг кўп рўбарў бўлган хитойликлар вакилларимиз билан шу пайтгача олти марта минтақа босқичи кортларида учрашган ва ҳозирча ўртадаги ҳисоб 3:3 бўлиб турибди. Демак, Наманган кортларида бўлиб ўтадиган еттинчи баҳсда бу гал ким устун келишига аниқлик киритилади.

Эслатиб ўтамиз, мазкур мусобақада зафар қучган жамоа Австралия-Хитой Тайпейи жуфтлиги ўртасидаги учрашув ғолиби билан кейинги босқичга чиқиш учун рақобатлашади. Ушбу беллашувда ғалаба қозонган мамлакат теннисчилари эса дунёнинг энг кучли 16 жамоаси ўртасида келаси йили ўтказиладиган қитъалараро турнирга йўлланмани қўлга киритади.