"Манчестер Сити" "Ривер Плейт"нинг 17 ёшли ярим ҳимоячиси Клаудио Эчеверри бўйича келишувга эришди, деб хабар беради The Guardian нашри.
Манбага кўра, "шаҳарликлар" аргентиналик футболчи учун 25 миллион евро тўлашга ва шу тариқа Эчеверрини қўлга киритиш учун курашда "Барселона"ни мағлуб этишга тайёр. Келишувдан сўнг ярим ҳимоячи ижара асосида яна бир йил "Ривер Плейт"да қолади. Футболчининг "Манчестер Сити" билан шартномаси 5 йилга мўлжалланган.
Эчеверри "Ривер Плейт" тарбияланувчиси ва академиядан асосий жамоагача бўлган йўлни босиб ўтган. Футболчининг клуб билан шартномаси 2024 йилнинг декабригача мўлжалланган. Transfermarkt портали аргентиналик футболчини 12 миллион еврога баҳоламоқда.
Жорий мавсумда Эчеверри 6 та ўйин ўтказиб, битта голли узатмани амалга оширди.
19 турдан кейин "Манчестер Сити" 37 очко билан Премьер-лигада 4-ўринни эгаллаб турибди. Чемпионатда "Ливерпуль" етакчилик қилмоқда (42 очко).
