Самарқандда бўлиб ўтаётган шахмат бўйича жаҳон чемпионатида кеча блиц баҳсларига старт берилди. Шахматнинг мазкур тезкор турида спортчилар 3 дақиқадан вақт ва ҳар бир юришга қўшимча 2 сониядан имконият берилган.

Бугун эркаклар 12 та, аёллар эса 9 та тур ўйин ўтказишди. Ўзбекистонлик эркак спортчилар орасида ҳозирча Жавоҳир Синдаров энг яхши натижани қайд этиб турибди. Ушбу гроссмейстер 13 имкониятдан 8 очко жамғариб, жадвалда 24-поғонани эгаллаб турибди.

7,5 очко тўплаган Шамсиддин Воҳидов эса 30-ўринга жойлашган. Нодирбек Ёқуббоев, Жаҳонгир Воҳидов ва Нодирбек Абдусатторов ҳисобида эса 7 тадан очко мавжуд.

Олти нафар шахматчи эса 9 очко жамғарган ҳолда пешқадамлик қилишмоқда (улар орасида Магнус Карлсен ҳам бор).

Аёллар ўртасидаги мусобақада эса Умида Омонова 6 очко билан 15-поғонани эгалаб турибди. Афруза Ҳамдамова эса 4,5 очко 54-ўринга жойлашган.

Жаҳон чемпионатида аёллар бугун яна 8та, эркаклар эса 9 тадан ўйин ўтказишади ҳамда ғолиб ва совриндорлар номи аниқ бўлади.