30 сентябрь куни ЎФФ анжуманлар залида Ўзбекистон U-20 ёшлар терма жамоаси бош мураббийи Аҳмаджон Мусаев ва пляж футболи бўйича Ўзбекистон терма жамоаси бош мураббийи Аҳаджон Юсупов иштирокида матбуот анжумани ўтказилади. Матбуот анжумани ЎФФ Терма жамоалар маркази директори Асқар Толибжонов ҳам иштирок этади.

Аҳмаджон Мусаев қўл остидаги Ўзбекистон U-20 ёшлар терма жамоаси, ёшлар ўртасидаги 2013 йилги жаҳон чемпионати баҳсларига тайёргарлик доирасида, январь ойида Россиянинг Санкт-Петербург шаҳрида ташкил этилган 2013 йилги МДҲ Кубоги баҳсларида иштирок этди. Ўзбекистонлик ёшлар мусобақа давомида Россия (2 марта), Қозоғистон (2 марта), Қирғизистон ва Тожикистон ёшлар терма жамоаларига қарши майдонга тушиб, умумий ҳисобда 12 жамоа орасида 7-ўринни эгаллашди.

Пляж футболи бўйича Ўзбекистон терма жамоаси эса 22-26 январь кунлари Қатарда ташкил этилган ЖЧ-2013 саралаш баҳсларида иштирок этди. Аҳаджон Юсупов шогирдлари гуруҳ босқичи Фаластин (5:6), Саудия Арабистони (6:8) ва БАА (1:7) терма жамоаларига имкониятни бой бериб, мундиал йўлланмасини қўлга киритиш имкониятини йўққа чиқаришди. 13-16-ўрин учун ўйинда ўзбекистонлик пляжчилар Филиппинни 8:2 ҳисобида мағлуб этишди, бироқ 13-ўрин учун ўйинда Таиландга бир тўп фарқи билан ютқазишди (3:4).

30 январь куни бўлиб ўтадиган матбуот анжуманида ОАВ ходимлари Аҳмаджон Мусаев ва Аҳаджон Юсуповга якунига етган мусобақалардаги Ўзбекистон жамоалари иштироки, кейинги режалар ва бошқа масалалардаги саволлар билан мурожаат қилишлари мумкин бўлади.

Матбуот анжуманда, шунингдек, Осиё Кубоги-2015 саралаш «Е» гуруҳи 1-тури ўйинлари доирасидаги Ўзбекистон – Гонгконг ўйинига тайёргарлик тўғрисида ҳам тўхталиб ўтилади, журналистлар бу масалада ЎФФ Терма жамоалар маркази директори Асқар Толибжоновга мурожаат қилишлари мумкин бўлади. 6 февраль куни ўтказиладиган ўйин чипталари тақдимоти ҳам матбуот анжуманида доирасида бўлиб ўтади.

Матбуот анжумани 30 январь, чоршанба куни, 11:00да бошланади.