"Манчестер Сити" ўз дарвозабони Зак Стеффеннинг "Колорадо Рэпидз" клубига ўтганини эълон қилди.
Стеффен 2019 йилдан бери “шаҳарликлар” шарафини ҳимоя қилиб келмоқда. Ўшандан бери Зак "Манчестер Сити" сафида барча мусобақаларда 21 та ўйин ўтказиб, 8 та ўйинда ўз дарвозаси даҳлсизлигини сақлаб қолди.
Стеффен икки марта ижарага берилган - 2019/20-йилда "Фортуна Дюссельдорф" ва 2022/23 йилда "Мидлсбро"га. Шунингдек, "Манчестер Сити" билан иккита Премьер-лига чемпионлиги ва Лига кубогини қўлга киритишга муваффақ бўлган.
Бу мавсумда Стеффен "Манчестер Сити"нинг биринчи рақамли Эдерсон ва унинг захирачиси Стефан Ортегадан кейин учинчи дарвозабон бўлди.
Энди 28 ёшли америкалик посбон "Колорадо Рэпидз" жамоасида ўйнайди, у билан 2026 йилгача шартнома имзолаган ва 12 ойга узайтириш имконияти мавжуд.
