Ўзбекистон чемпионатининг моҳир ҳужумчиларидан саналган Шуҳрат Мирҳолдиршоевнинг "Навбаҳор"га қайтиши ҳақида гаплар урчиганди. Бунга футболчининг ўзи аниқлик киритиб ўтди.

— Одатда сизни қишки йиғин чоғида бирор-бир клубда тайёргарлик кўраётганингизга гувоҳ бўлардик. Аммо ҳозирда ҳеч бир жамоада кўраётганимиз йўқ. Бунинг сабаби нимада?
— Бу нарса соғлигим билан боғлиқ. «Насаф» билан тузилган шартномам ҳам тугади. Агарда соғлигингиз яхши бўлмаса, қандай қилиб бирор-бир жамоа сафига ўтасиз? Айнан соғлигим туфайли ҳеч қайси клуб билан шартнома тузмадим. Ҳозирда даволаниш билан вақт ўтказяпман.

— "Навбаҳор"га қайтишингиз борасида фикрлар пайдо бўлди, шунга аниқлик киритиб ўтсангиз.
— Мени «Навбаҳор»га қайтишим тўғрисида ҳақиқаттан ҳам хар хил гап-сўзлар бўляпти. Лекин буларнинг ҳаммаси миш-миш гаплар холос. Агарда ўзимни жуда яхши ҳис қилганимда аллақачон янги жамоада шуғулланаётган бўлардим. Таклиф бўлган жамоаларнинг мураббийларига соғлигимни яхшилаётганим сабабли ҳозир футбол ҳақида ўйламаётганимни айтдим.

— Наҳотки, биринчи даврани ҳам даволаниш билан ўтказиб юборишингиз аниқ бўлса?
— Ҳа, бу аниқ бўлиб турибди. Янги жамоа билан шартнома тузиб, лекин у ерда шуғулланмасам буни мен учун нима кераги бор? «Насаф»да ҳам соғлигим туфайли кўплаб ўйинларни ўтказиб юборишга мажбур бўлдим. Атайлаб ўйнамаслик менга хос бўлган нарса эмас. Қачонки, ўзимни яхши ҳис қилсам ўшанда майдонга тушаман.