"Удинезе" ярим ҳимоячиси Лазар Самарджич жорий қишки трансфер ойнасида клубини ўзгартириши мумкин. Бу ҳақда журналист Руди Галетти ижтимоий тармоқ хабар берди.
Манбага кўра, ҳозирда томонлар келишувнинг якуний тафсилотлари бўйича муҳокамаларни якунламоқда. Дастлабки маълумотларга кўра, "Наполи" 21 ёшли ярим ҳимоячи учун 23 миллион евро тўлайди. Қўшимча бонуслар ҳам тақдим этилади. Қайд этилишича, футболчининг ўзи ҳам ушбу трансфердан манфаатдор ва неаполликлар билан шахсий шартномаси шартларини келишиб олган.
Жорий мавсумда Самарджич Италия А Сериясида "Удинезе" сафида 17 та ўйин ўтказиб, 2 та гол ва 2 та голли узатмага муаллифлик қилган. Футболчининг клуби билан амалдаги шартномаси 2026 йилнинг июнь ойи охиригача амал қилади.
