Италия солиқ қўмитаси бундан буён собиқ футболчи Диего Марадонага ҳеч қандай тазйиқ ўтказа олмайди. Бу ҳақда унинг адвокати Анжело Пизани хабар бермоқда.

«Марадона ниҳоят солиқ билан боғлиқ муаммолардан қутилди»,- дейди Пизани.

Юристнинг таъкидлашича, Марадона бу билан чекланмоқчи эмас. У ўзига етказилган моддий ва маънавий зарар учун Италия солиқ инспекциясидан 40 миллион евро миқдоридаги товон пули талаб қилмоқчи.

Шу пайтгача солиқчилар Марадонанинг давлатдан 40 миллон евро қарзи бор деб келишарди, лекин буларнинг барчаси ёлғонлиги исботланди.

Эслатиб ўтамиз, Марадона 1984/1991 йилларда Италиянинг «Наполи» жамоаси сафида тўп сурган.