Лондоннинг "Челси" клуби собиқ футболчиси Уейн Бриджнинг фикрича, "пенсионерлар" ярим ҳимоячи Конор Галлахерни жамоада сақлаб қолишлари керак.
"Конорнинг кетиши ҳатто муҳокама қилинаётгани аҳмоқлик. Мейсонни қўйиб юбориш нотўғри эди. Мен Галлахернинг клубда қолишини истайман. Агар у сотиладиган бўлса, мухлислар ғазабланишади", - дея Бридж сўзларини келтиради The Mirror.
Аввалроқ матбуотда “Тоттенхэм” Галлахерни ўз сафига қўшиб олмоқчи эканлиги ҳақида хабарлар тарқалган эди. Конор "Челси" академияси тарбияланувчиси. Жорий мавсумда 23 ёшли ярим ҳимоячи Англия чемпионатида 19 та ўйин ўтказиб, 4 та голли узатмани амалга оширди. Томонлар ўртасидаги меҳнат шартномаси 2025 йилнинг ёзида тугайди.
