Теннис бўйича Ўзбекистон терма жамоаси муддатидан аввал Девис кубогининг кейинги босқичи йўлланмасини қўлга киритди. Осиё ва Океания минтақаси 1-гуруҳининг дастлабки босқичида иштирок этаётган ҳамюртларимиз икки кун натижаларига кўра Хитойни 3:0 ҳисобида мағлуб этишмоқда.

Бугун Намангандаги "Паҳлавон" спорт мажмуасида жуфтлик баҳслари бўлиб ўтди. Денис Истомин/Фаррух Дўстов жуфтлиги хитойлик Мао Син Гонг/Же Ли жуфтлигига қарши баҳс олиб борди ва учта сетда баҳс тақдирини ҳал қилишди.

Биринчи сетда вакилларимиз битта брейк натижасида ғалаба қозониши — 6:3. Иккинчи сет тақдири эса тайбрекда ҳал бўлди. Учинчи сетда ҳам ҳамюртларимиз 6:3 ҳисобида ғалаба қозониб, терма жамоамизга учинчи очкони келтиришди.

Натижада эртага бўладиган яккалик баҳсларидан қатъи назар, вакилларимиз кейинги босқич йўлланмасини ҳал қилиб бўлишди. Кейинги босқичда Ўзбекистонга Австралия терма жамоаси рақиблик қилади.

Девис кубоги. Осиё ва Океания минтақаси. 1-зона.
ЎЗБЕКИСТОН - ХИТОЙ - 3:0
Денис Истомин - Ди Ву - 3:2 (4-6, 4-6,  7-6 (4), 7-5, 6-2)
Фаррух Дўстов - Зе Жанг - 3:2 (4-6, 7-6 (8), 6-4, 3-6, 6-4)
Фаррух Дўстов/Денис Истомин - Мао Син Гонг/Же Ли - 3:0 (6:3, 7:6, 6:3)