Туркиянинг Анталья шаҳрида янги мавсумга тайёргарлик кўраётган "Нефтчи" жамоаси бугун дастлабки ўртоқлик, яъни назорат учрашувини бошлайди. Бу баҳсда жамоа Қозоғистоннинг "Актобе" клуби билан куч синашади. Жамоалар илгаритдан бир бирини яхши билади. Совет давридаги мамлакат биринчилигида иккала жамоа иккинчи лига мусобақаларида саккиз марта бир бири билан юзлашган. Бу учрашувларда фарғоналиклар 4 марта, қозоғистонликлар эса 3 марта ғолибликни қўлга киритган. Битта баҳс дуранг натижа билан тугаган.
"Актобе" футбол клуби 1967 йилда ташкил топган. Қозоғистон мустақилликка эришгач, мамлакат футбол мусобақаларида фаол қатнашиб келган жамоа етакчи ўринларни эгаллаб 5 марта чемпион бўлган, 4 марта кумуш ва 4 марта бронза медалини қўлга киритган. Бир марта Қозоғистон республикаси кубоги соҳиби бўлган.
Бугун "Нефтчи" Қозоғистоннинг ана шу машҳур клуби билан назорат-синов баҳсини ўтказиш учун майдонга тушади. Учрашув Тошкент вақти билан соат 17:00да бошланади.
