"Манчестер Юнайтед" ҳимоячиси Альваро Фернандес фаолиятини "Бенфика"да давом эттиради. Бу ҳақда журналист Фабрицио Романо хабар бермоқда.
20 ёшли испаниялик футболчи жорий мавсумнинг биринчи даврасини ижара асосида "Гранада"да ўтказди. Манбага кўра, "Бенфика" Фернандесни сотиб олиш опцияси билан мавсум охиригача ижарага олади.
Маълум қилинишича, томонлар ўртасида келишув аллақачон имзоланган. Жорий мавсумда Фернандес барча турнирларни ҳисобга олган ҳолда 14 та учрашувда қатнашиб, гол ура олмади. Transfermarkt портали маълумотларига кўра, Фернандеснинг нархи етти миллион еврога тенг.
