Дортмунднинг “Боруссия” клубида жорий мавсум охиригача ижара асосида ўйнаётган "Манчестер Юнайтед" вингери Жейдон Санчо "Дармштадт"ни 3:0 ҳисобида мағлуб этган “арилар” сафига қайтганидан кейинги илк ўйиндаги ҳис-туйғулари билан ўртоқлашди.
"Уйга келгандек бўлдим. Майдонга қайтганимдан хурсандман. Мен яна хурсанд бўлиш, табассум қилиш ва жамоага ёрдам бериш учун келдим.
Ройсга берган голли узатма? Шундай бўлиши керак. Мен Маркога ёрдам бериб, қайтдим", — деди Санчо.
Эслатиб ўтамиз, 77-дақиқада ярим ҳимоячи Марко Ройс Санчонинг узатмасидан гол урди.
Англиялик футболчи аввал 2017 йилдан 2021 йилгача "Боруссия"да ўйнаган. Шу вақт ичида у барча турнирларда 137 та учрашувда қатнашиб, 50 та гол ва 64 та голли узатмани амалга оширган.
