Осиё кубогининг илк ўйинида деярли барча терма жамоамиздан ғалаба кутганди. Аммо қийин ўйинда дуранг билан кифояландик. Агар ўйин сўнгидаги гол офсайд туфайли бекор қилинмаганида ютқазиб қўйишимиз ҳам мумкин эди.

1. Ўзбекистон Осиё чемпионатларинининг биринчи ўйинини ҳеч қачон яхши ўтказмаган (2011 йилги турнирда Қатарга қарши ўйин бундай мустасно). Ҳар сафар қийналганмиз. Футболчиларимизнинг маҳорати эвазига бир амаллаб ютиб олардик. Шахсан ўзим, бу сафар ҳам қийин ўйин бўлишини кутгандим. Ёмон ўйнамадигу, аммо имкониятлардан фойдалана олмадик (Сайфиев, Шукуров). Аслида январь ойида футболчиларимизни юқори формага чиқиши осон иш эмас. Боиси, Суперлига ва ОЧЛда мавсум декабрь ойи бошида якунига етади. Футболчилар 1-2 ҳафта дам олиб, тайёргарликни бошлашди. Ўйинчилар жисмоний жиҳатдан маълум савияга чиққан бўлса-да, ўйин "тонус"ига киришга улгурмади. Боз устига, терма жамоамиз Осиё кубоги олдидан атиги 2 та назорат ўйинини ўтказди. Бу кам.

2. Умид қиламан, Катанец консерватив услубидан воз кечиб, кейинги ўйинларда номдор футболчиларни эмас, айни пайтда яхши тайёргарликка эга ўйинчиларнинг хизматидан фойдаланади. Масалан, Сурияга қарши ўйинда Аббос Файзуллаев асосий таркибда ўйнашга муносиб эканини исботлади.

3. Катанец ҳужум чизиғида Ўруновни ўйнатиб кўрди. Зич ҳимояланадиган жамоага қарши баҳсда бу ўзини оқламади. Остонга бўш ҳудуд кўпроқ керак экан. Шунинг учун қанотларда унинг фойдаси кўпроқ тегиши мумкин. Ҳиндистон ҳам бутун жамоа бўлиб ҳимояланишини инобатга олсак, Остонни ҳужумга эмас, қанотга қўйгани маъқул (Сурияга қарши ўйиннинг сўнгги ярим соатида бўлгани каби).

Бундан ташқари, "автобус" қўядиган жамоаларга қарши баҳсда Жамшид Искандаровнинг фойдаси тегади. Боз устига, унинг Ўрунов билан яхши тандем эканини инобатга олсак, ҳиндларга қарши ўйинда Жамшид асосий таркибда ўйнаши керак, назаримда.

4. Аслида Ўзбекистон миллий жамоамизнинг ҳозирги тайёргарлиги ёмон эмас. Фақат озгина ноодатий комбинацияларни кўпайтириб, стандарт вазиятлардан фойдаланиш ҳақида кўпроқ бош қотириш керак.

5. Гуруҳ босқичидаги 3 та ўйин ва нимчорак финал баҳси Ўзбекистон учун юқори формага чиқишга ёрдам берадиган ўйинлар вазифасини ўташи керак. Стратегик нуқтаи назарда олиб қараганда, биз чорак финалдан бошлаб энг юқори формага чиқа олишимиз керак. Катанец шундан келиб чиқиб, ротация қилиш орқали, ўйинчиларнинг чорак финалгача яхши тонусга кириб олишини таъминлаши талаб этилади.