Андре Онана Камерун терма жамоасининг Африка кубогидаги илк ўйинини ўтказиб юбориши мумкин.
"Манчестер Юнайтед" дарвозабони "Уиган" (2:0) ва "Тоттенхэм" (2:2)га қарши ўйинларда иштирок этиш учун терма жамоага кетишини қолдирди.
Бугун Камерун терма жамоаси Африка кубоги гуруҳ босқичининг 1-тури доирасида Гвинея терма жамоаси билан учрашади. Учрашув Ивуарнинг Ямусукро шаҳридаги стадионда бўлиб ўтади. Онана ўйин бошланишидан олдин жамоадошлари сафига қўшилиши керак эди, бироқ унинг шахсий самолёти Ямусукро аэропортидаги туман туфайли кечиктирилди.
Manchester Evening News нашрининг Sports Vibes нашрига таяниб хабар беришича, Андре Абиджанда ва стадионга машинада етиб боришга ҳаракат қилади. 240 километрлик саёҳат тахминан 3 соат давом этади.
Камерун - Гвинея учрашуви Тошкент вақти билан соат 22:00да бошланади.
