Янги футбол мавсуми бошланишига ҳам кўп вақт қолгани йўқ. Барча жамоалар мавсум ҳозирлигини кўтаринки руҳда олиб боришмоқда. Лекин «Навбаҳор» ҳақида бундай дея олмаймиз. Келинг, барчасини бошидан бошлаймиз.
Режага кўра футболчилар декабр охирида тўпланишлари лозим эди. Бироқ, ҳеч қандай йиғин ўтказилмади ҳамда январдан бошлаб футболчилар тўплана бошлашди. Тўпланганда ҳам барча футболчилар йиғилмади. Бошқа жамоалар кўригида бўлишга улгуриб, якунда талабга жавоб бермаганлар яна жамоага қайтиб келишди, худди «Навбаҳор» кўчадаги футболчилардан тузилган жамоадек!
Дастлабки машғулотлар ўтказила бошлагач, клуб раҳбариятида ўзгаришлар содир бўлди. Бу ўзгариш балки қайсидир маънода ижобий бўлгандир. Лекин биз клубни тажрибали шахс бошқаришини истагандик. Клуб ижрочи-директори этиб тайинланган Ғанишер Исмоиловни албатта ҳурмат қиламиз, бу инсон бир неча йиллардан бери «Навбаҳор»да меҳнат қилиб келди. Бироқ юқорида айтиб ўтганимиздек, бу лавозимда бошқа тажрибали шахсни кўришни истагандик. Ҳеч бўлмаганда шундай лавозимларда ишлаган мутахассисни!
Бош мураббий лавозимига ўтган мавсум давомида талаб қилиб келинган Усмон Асқаралиев яна ўз жойига қайтарилди. Аммо Асқаралиевга етарли шароит яратиб берилмаса, Усмон Аҳмедович ҳам ҳеч нарса қила олмаслиги тайин. Машғулотлар мана ҳозирга қадар фақат Наманганда олиб борилди. Бунисига розимиз майли, лекин лоақал биронта ҳам назорат учрашуви ташкил этилмади. Ҳеч бўлмаса «Андижон» билан ўйнаш мумкин эди. Тўғри, клубда молиявий муаммолар ҳали ҳам ижобий ҳал қилинмаган. Пул йўқ, деб қараб туриш ярамайди. Биласизми, мени нима хурсанд қилди? «Металлург» бир неча йилдан сўнг хорижга йиғин ўтказиш мақсадида йўл оларкан! Бўларкану! Бир ҳақиқат борки, Бекободда тўп сурган футболчилар ҳеч қачон маблағ борасида шикоят қилишмаган!
Клуб Наманганда олиб борган йиғини чоғида таркибда жиддий ўзгариш бўлгани йўқ. Саноқли футболчилар синовдан ўтказилди. Ўша футболчилар ҳам жамоасиз қолган ўйинчилар сирасига киришини айтиб ўтиш керак. Таркибни маҳаллий ўйинчилардан Алишер Маҳмудов тарк этди. Майли, «Навбаҳор»ни эшиги ҳамма учун очиқ, кетадиганлар марҳамат! Шуни алоҳида айтиб ўтиш жоизки, Маҳмудов «Бухоро»га киришиб кетгунча анча вақт талаб этилади. Бу орада захира ўйинчиси бўлиб қолмаса бўлгани. Собиқ «навбаҳорчи»лардан Шуҳрат Мирҳолдиршоев ҳамда Отабек Валижоновлар «лочинлар» сафига қайтишмаслигини айтиб ўтишди. Бунисига ҳам розимиз! Қайтмаса қайтмас, лекин кун келиб шундай «садоқатлилар» учун клуб эшиги ёпилиши лозим! Бу шахсий фикрим.
Шу ҳафтадан клуб Тошкентда йиғин бошлаши керак. Шундай экан, нега жамоа «ПФЛ Кубоги»да қатнашишни истамади? Айни дамда бу турнирда иштирок этиш жамоа учун жуда зарур эди! Ҳа, жуда! Мусобақада натижа муҳим эмасди, шунчаки футболчилар ҳолати кўздан кечириларди. Ҳадеб югур-югур билан ҳеч нарсага эришиб бўлмаслигини мураббийларимиз билишади. Аттанг, тайёр учрашувлар ҳавога учди.
Йиғин давомида таркибга тажрибали футболчилар қўшилиши лозим. Афтидан, яна эски ҳолат шекилли. Яна кераксиз футболчилар «Навбаҳор» тобланишади! Бу йилги чемпионатда иштирок этишдан мақсад нима ўзи? Яна сўнгги ўринлар учун курашми? Ундан кўра тинчгина 1-лигада лидер бўлиб юрган яхшимасмиди? «Андижон» биринчи лигага йўл олган чоғда бир андижонлик мухлис «Энди сафарда ҳам ғалаба қозонамиз», деганди. Таркиб кучайтирилмас экан, аҳвол оғирлигича қолаверади. Ваҳоланки, янги мавсум эшик қоқиб турибди, бизда ҳали ҳам жамоа шаклланмаган. Қисқа фурсат ичида билмадим, қандай ишлар амалга оширилар экан. Фақат мавсум ўрталарида футболчилар майдонда бир-бирлари билан тил топишиб кета олишмаяпти, деб баҳоналар қилинмаса бўлгани. Бунга ўрганиб ҳам қолганмиз. Ҳа, вақтнинг ўзи барчасига кўниктирар экан.
Улуғбек АБДУЛЛАЕВ
