Ҳиндистон терма жамоаси бош мураббийи Игорь Штимац Осиё кубоги гуруҳ босқичи 2-тури доирасида бўлиб ўтадиган Ўзбекистонга қарши ўйин олдидан ўз фикрлари билан ўртоқлашди.

"Ўзбекистон — жуда яхши ва рақобатбардош жамоа. Бу жамоанинг сўнгги натижалари унинг қандай кучга эга эканини кўрсатмоқда. Биринчи турда ғалаба қозона олмагани, уларга босим ўтказади.

Бизни илк дақиқаларданоқ прессингга тўла ўйин кутиб турибди. Бунга дош бериш йўлини топишимиз керак. Бизнинг футболчилар ҳам ҳаяжонда. Лекин уларда яна бир имконият борлигидан ўйинчилар хурсанд.

Етакчи ўйинчиларимиздан бири Саҳал ҳали ўйинга тайёр эмас. Бундан ташқари Австралияга қарши ўйиндан кейин яна 2 футболчимизда ҳам муаммо юзага келган. Уларни айтмайман. Ўзбекистонга қарши ўйинда бошқа ўйинчилар майдонга тушади.

Биз ҳужумкор ўйин услубини танлаймиз. Австралияга қарши ўйинимизни таҳлил қилиб, шунга амин бўлдимки, бизда имкониятлар кўп бўлди, аммо дарвозага зарба бериш ўрнига пас беришга қарор қилдик. Бу мени ранжитди.

Катанец иккимиз бир-биримизни яхши биламиз. Сречко Ҳиндистоннинг биринчи ўйинини томоша қилганига шубҳам йўқ. Шунингдек, мен ҳам Ўзбекистоннинг ўйинини кўрдим. Ўзбекистоннинг хавфли жиҳатларини йўққа чиқаришга ҳаракат қиламиз, — деди Штимац.