Hindiston terma jamoasi bosh murabbiyi Igor Shtimas Osiyo kubogi guruh bosqichi 2-turi doirasida bo‘lib o‘tadigan O‘zbekistonga qarshi o‘yin oldidan o‘z fikrlari bilan o‘rtoqlashdi.

"O‘zbekiston — juda yaxshi va raqobatbardosh jamoa. Bu jamoaning so‘nggi natijalari uning qanday kuchga ega ekanini ko‘rsatmoqda. Birinchi turda g‘alaba qozona olmagani, ularga bosim o‘tkazadi.

Bizni ilk daqiqalardanoq pressingga to‘la o‘yin kutib turibdi. Bunga dosh berish yo‘lini topishimiz kerak. Bizning futbolchilar ham hayajonda. Lekin ularda yana bir imkoniyat borligidan o‘yinchilar xursand.

Yetakchi o‘yinchilarimizdan biri Sahal hali o‘yinga tayyor emas. Bundan tashqari Avstraliyaga qarshi o‘yindan keyin yana 2 futbolchimizda ham muammo yuzaga kelgan. Ularni aytmayman. O‘zbekistonga qarshi o‘yinda boshqa o‘yinchilar maydonga tushadi.

Biz hujumkor o‘yin uslubini tanlaymiz. Avstraliyaga qarshi o‘yinimizni tahlil qilib, shunga amin bo‘ldimki, bizda imkoniyatlar ko‘p bo‘ldi, ammo darvozaga zarba berish o‘rniga pas berishga qaror qildik. Bu meni ranjitdi.

Katanes ikkimiz bir-birimizni yaxshi bilamiz. Srechko Hindistonning birinchi o‘yinini tomosha qilganiga shubham yo‘q. Shuningdek, men ham O‘zbekistonning o‘yinini ko‘rdim. O‘zbekistonning xavfli jihatlarini yo‘qqa chiqarishga harakat qilamiz, — dedi Shtimas.