Жордан Хендерсон “Ал-Иттифоқ”ни тарк этиш учун 4 миллион фунт стерлингни рад этди.
Аввалроқ, ярим ҳимоячи "Аякс"га ўтиш учун Саудия клуби билан шартномасини бекор қилишга рози бўлгани малум бўлганди. 33 ёшли футболчи “Ал-Иттифоқ”га 2023 йилнинг ёзида “Ливерпуль”дан келиб қўшилганди.
Хабар қилинишича, инглизга Саудия Арабистонида маош берилмаган: у Буюк Британияда солиқ тўламаслик учун "Ал-Иттифоқ" билан келишиб олган.
Журналист Бен Жейкобснинг сўзларига кўра, Хендерсон тўланиши керак бўлган кечиктирилган маошдан (тахминан 4 миллион фунт) бош тортган. Саудия Арабистонидаги манбаларнинг таъкидлашича, бу билан футболчи "Ал-Иттифоқ"нинг "Ливерпуль"дан трансфери учун сарфланган харажатларни қоплаган, бу эса саудияликларга 12 эмас, балки 4 миллион фунтга тушган.
