Про лигага тушиб кетган «Турон» футбол клуби молиявий қийинчилик сабаб фаолиятини давом эттириши сўроқ остида экани ҳақида маълум қилгандик.

18 январь куни клуб бош директори Ассоциация ҳамда Лигага хат йўллаб, футболга бефарқ бўлмаган тадбиркорлар билан ҳамкорликда ишлашга тайёр эканлигини маълум қилди. ПФК «Турон» МЧЖ янги ҳомийлар жалб этиш, ўзаро келишув асосида клубга эгалик қилиш ҳуқуқини беришга тайёр деб ёзилади хатда.

Бунда клуб фаолияти ва инфратузилмасини сақлаб туриш учун баъзи талаблар бор:

— клуб фаолиятини ривожлантириш;

— клубнинг мавжуд спорт объектлари ва футбол майдонидан фақатгина спорт фаолияти йўналишида фойдаланиш;

— клуб қароргоҳи ва академиясини сақлаб туриш, ривожлантириш;

— клуб тизимидаги жамоаларнинг мавжуд мусобақалардаги иштирокини таъминлаш.

Шу талаблар асосида клубга эгалик қилиш истагида бўлганлар +998 99 405 97 80 рақами билан боғланиши мумкин.

Маълумот учун, «Турон» ФК қисқа вақт давомида катта йўлни босиб ўтган кам сонли хусусий клуб ҳисобланади. Ўтган вақт давомида клуб ўз инфратузилмасини яхшилашга эришди. Яйпандаги Ўзбекистон стадиони Суперлига талабига тўла мослаштириб таъмирдан чиқарилди. Шунингдек, стадион атрофидаги бўш ҳудудда клуб базаси, академияси ва унга тегишли футбол майдонлари барпо этилди.