“Пахтакор футбол клуби” МЧЖнинг 100 фоиз давлат улушини сотиш бўйича оммавий савдо жараёнлари вақтинчалик тўхтатилди.

Давлат активларини бошқариш агентлиги хабарига кўра, “жамоатчилик томонидан билдирилган фикрларни ўрганган ҳолда” шундай қарорга келинган.

Агентлик “Пахтакор”нинг хусусийлаштирилиши ҳақида кеча, 17 январ куни эълон берган эди.

Харидорга қуйидаги талаблар қўйилиши маълум қилинганди:

• футбол клубининг фаолиятини сақлаб қолиш, ривожлантириш ва халқаро даражага олиб чиқиш;
• футбол клуби балансидаги барча спорт объектларидан, шу жумладан, футбол майдонидан фақатгина спорт фаолияти йўналишларида фойдаланиш;
• “Пахтакор” футбол клуби академияси фаолиятини сақлаб қолиш ва ривожлантириш.

“Пахтакор” хусусийлаштирилиши эълон қилингач, Тошкент шаҳри марказидаги 24 гектардан зиёд майдонни эгаллаган стадион ва спорт инфратузилмаси ҳам клуб билан бирга қўшиб сотилиши танқидларга сабаб бўлаётган эди.