Хабарингиз бор, шу кунларда анъанавий ПФЛ кубоги-2013 мусобақалари бўлиб ўтмоқда. Мавсумга қизғин ҳозирлик кўраётган «Локомотив» ёшлари ҳам бу мусобақада иштирок этишяпти. Бугун турнирнинг 2-тур ўйинлари доирасида ёш темирйўлчилар Олий лиганинг янги вакили «Гулистон» клуби билан куч синашишди. «Дўрмон» ўйингоҳида бўлиб ўтган учрашувни вакилларимиз ёмон бошлашмади.

6-дақиқадаёқ Шарипов «Локомотив»ни ҳисобда олдинга олиб чиқди. Аммо, аста-секин тажрибали «Гулистон» жамоаси ташаббусни ўз қўлига олди ва якунда мақсадига эришди. Аввалига рақиб ҳужумини бартараф этиш чоғида жамоамиз аъзолари ўз дарвозаларини ишғол этиб қўйишди ва бу билан рақиб жамоага ёрдам бериб юборишди. Ўйин якунланишига 10 дақиқача қолган бир пайтда ўзининг аввалги спорт формасини тиклашга уринаётган Рустам Қодиров гулистонликларга ғалаба келтирган тўп муаллифи бўлди.

Шундай қилиб «Локомотив» ёшлари ПФЛ кубоги доирасидаги иккинчи ўйинда ҳам имкониятни бой беришди. Энди жамоамиз навбатдаги учрашувни 8 февраль куни яна «Дўрмон» ўйингоҳида «Қизилқум» жамоасига қарши ўтказади.

«Локомотив» – «Гулистон» – 1:2 (1:0). «Дўрмон» ўйингоҳи.
Ҳакамлар: Б.Номозов, А.Буров, Д.Сайловов, Н.Мешьков.
Голлар: Шарипов (6) – Рахимов (49-авт.), Қодиров (81).
Огоҳлантиришлар: Эрназаров (44) – Магдеев (29), Х.Юлдошев (44), Ҳасанов (48), Шоғуломов (89), Худойбердиев (90+3).
Назоратчи – Г.Имомов.