“King Plaza” меҳмонхонасида ҳакамлар учун семинар бошланди. Унда CAFA'га аъзо мамлакатлардан 25 нафар ҳакамлар иштирок этмоқда.
Семинарни ЎФА биринчи вице-президенти, CAFA ҳакамлар қўмитаси раиси Равшан Ирматов очиб бериб, иштирокчиларга бугунги кунда футболга замонавий технологияларнинг кириб келиши ортидан футболнинг жадаллик билан ривожланиб бораётгани, бу эса ҳакамларнинг масъулиятини оширишини таъкидлади. Футболнинг янада жозибалироқ бўлишида ҳакамларнинг ўрни беқиёс бўлишига алоҳида урғу берилди. Шу сабабли ҳакамлар янги мавсумга жиддий тайёргарлик қилиши, футбол қоидалари ва хорижий тиллар бўйича билимларини доимий янгилаб бориши кераклиги айтилди. Ўз ўрнида, CAFA ҳакамликка жиддий эътибор бериб, унинг ривожланиши йўлида қатор ишлар амалга ошираётгани билдирилди.
Семинар давомида ҳакамлар ўйин қоидалари юзасидан назарий тест ва видео тест топширишди. Шунингдек, инструкторлар томонидан ўйиндан ташқари ҳолат, тактик фоллар мавзуларида назарий машғулотлар ташкил этилди.
Қайд этиш керак, семинар ҳамда ВАР курсларини ўз ичига олган ўқув-амалий машғулотлар 25 январга қадар давом этади.
