“King Plaza” mehmonxonasida hakamlar uchun seminar boshlandi. Unda CAFA'ga a’zo mamlakatlardan 25 nafar hakamlar ishtirok etmoqda.

Seminarni O‘FA birinchi vise-prezidenti, CAFA hakamlar qo‘mitasi raisi Ravshan Irmatov ochib berib, ishtirokchilarga bugungi kunda futbolga zamonaviy texnologiyalarning kirib kelishi ortidan futbolning jadallik bilan rivojlanib borayotgani, bu esa hakamlarning mas’uliyatini oshirishini ta’kidladi. Futbolning yanada jozibaliroq bo‘lishida hakamlarning o‘rni beqiyos bo‘lishiga alohida urg‘u berildi. Shu sababli hakamlar yangi mavsumga jiddiy tayyorgarlik qilishi, futbol qoidalari va xorijiy tillar bo‘yicha bilimlarini doimiy yangilab borishi kerakligi aytildi. O‘z o‘rnida, CAFA hakamlikka jiddiy e’tibor berib, uning rivojlanishi yo‘lida qator ishlar amalga oshirayotgani bildirildi.

Seminar davomida hakamlar o‘yin qoidalari yuzasidan nazariy test va video test topshirishdi. Shuningdek, instruktorlar tomonidan o‘yindan tashqari holat, taktik follar mavzularida nazariy mashg‘ulotlar tashkil etildi.

Qayd etish kerak, seminar hamda VAR kurslarini o‘z ichiga olgan o‘quv-amaliy mashg‘ulotlar 25 yanvarga qadar davom etadi.