Сўнгги 2 мавсумни Ўзбекистонда ўтказган беларуслик футболчи Николай Риндюк, Беларусь Биринчи лигаси вакили "Сморгонь" клуби билан бир йиллик шартнома имзолади. Риндюк "Спорт Панорама" газетаси мухбирига берган интервьюсида Ўзбекистонда фаолияти ҳақида ҳам тўхталиб ўтган.

— "Сморгонь" варианти қандай пайдо бўлди?
— Мен "Навбаҳор"га жўнаб кетиш олдидан "Сморгонь" сафида ярим мавсумни ўтказгандим. Бу жамоа бош мураббийи Павел Батютни яхши танийман. Уйга қайтганимдан кейин эса вазиятга реал баҳо бердим ва айнан "Сморгонь"ни танладим.

— Наманганнинг "Навбаҳор" клубида қолиш варианти ҳам бор эдими?
— Мен Ўзбекистон чемпионатига иккинчи даврада қўшилдим. Жамоага олий лигада қолиш учун ёрдам бердим. Лекин ҳар қандай ҳолатда ҳам у ерда қолмасликка қарор қилдим. Бу шунчаки фожиа. Бу жамоа эмас, қандайдир бир нарса! Мен "Навбаҳор" раҳбариятини назарда тутяпман.

— Аввалги ўзбек клубларидаги ишларингиз бутунлай бошқача эди...
— Ҳа, "Машъал"да ҳам, Самарқанднинг "Динамо" клубида ҳам вазият бу даражада ёмон эмасди. Бу менинг айбим. Энди гапиришдан маъно йўқ, барибир ортга қайтариб бўлмайди.

— 30 ёшдан ошгандан кейин журналистлар фаолиятингизни қачон якунлашингиз ҳақидаги саволни кўп беришига муносабатингиз.
— Буни хотиржам қабул қиламан. Мен вазиятга реал баҳо бераман. Бу йил ҳам Ўзбекистондан таклиф тушганди, аммо мен уни рад қилдим. Беларусда қолишга қарор қилдим. Футболдан кетмасам керак. Футболчиликни тўхтатгандан кейин мураббийлик қилишни ўйлаяпман. Масалан, "Сморгонь"га ўйинчи сифатида келган бўлсам ҳам, норасмий равишда мураббий ёрдамчиси вазифасини ҳам бажараман. Жамоа ва мураббийлар штаби ўртасида кўприк вазифасини бажараман. Мураббийлик фаолиятини биринчи лигада бошлаш — тўғри қарор, деб ўйлайман. Барча ишга бир текис ўтиш лозим.