Нидерландиянинг Вейк ан-Зее шаҳрида шахмат бўйича Tata Steel Chess 2024 турнирида бугун 11-тур баҳслари ўтказилди.
Турнирнинг Мастерс гуруҳида иштирок этаётган ўзбекистонлик гроссмейстер Нодирбек Абдусатторов бу турда хитойлик аёл Жу Венжунга қарши оқ доналарда ўйнади.
Ҳамюртимиз рақиб учун кутилмаган дебют тайёрлаб келгани маълум бўлди ва 20-юришдан кейин аста-секин ташаббусни ўз қўлига ола бошлади. Айниқса, Нодирдбек 23-юришда ўз Отини қурбон қилган ҳолда рақиб пиёдасини уриб олиш ўйин тақдирини ҳал қилувчи юриш бўлди.
Жу Венжун бир нечта ноаниқ юришларни амалга оширган бўлса, Абдусатторов 5-6 та ўта кучли юришлар қилиши оқибатида рақибни деярли мот ҳолатига олиб борди. Хитойлик шахматчи 34-юришда таслим бўлди.
Ушбу ғалаба туфайли Абдусатторовнинг очколари 7,5 тага етди ва у яққол пешқадамга айланди. Боиси, ҳиндистонлик Домараджу Гукеш бу турда Алиризо Фиружа билан дуранг ўйнади.
Tata Steel Chess-2023 мусобақасининг 12-турида ҳамюртимиз эртага ҳиндистонлик Видит Сантош Гужратҳи қарши қора доналарда ўйнайди. Бу спортчи 6,5 очко билан жадвалда 5-ўринни эгаллаб турибди.
