Niderlandiyaning Veyk an-Zee shahrida shaxmat bo‘yicha Tata Steel Chess 2024 turnirida bugun 11-tur bahslari o‘tkazildi.
Turnirning Masters guruhida ishtirok etayotgan o‘zbekistonlik grossmeyster Nodirbek Abdusattorov bu turda xitoylik ayol Ju Venjunga qarshi oq donalarda o‘ynadi.
Hamyurtimiz raqib uchun kutilmagan debyut tayyorlab kelgani ma’lum bo‘ldi va 20-yurishdan keyin asta-sekin tashabbusni o‘z qo‘liga ola boshladi. Ayniqsa, Nodirdbek 23-yurishda o‘z Otini qurbon qilgan holda raqib piyodasini urib olish o‘yin taqdirini hal qiluvchi yurish bo‘ldi.
Ju Venjun bir nechta noaniq yurishlarni amalga oshirgan bo‘lsa, Abdusattorov 5-6 ta o‘ta kuchli yurishlar qilishi oqibatida raqibni deyarli mot holatiga olib bordi. Xitoylik shaxmatchi 34-yurishda taslim bo‘ldi.
Ushbu g‘alaba tufayli Abdusattorovning ochkolari 7,5 taga yetdi va u yaqqol peshqadamga aylandi. Boisi, hindistonlik Domaradju Gukesh bu turda Alirizo Firuja bilan durang o‘ynadi.
Tata Steel Chess-2023 musobaqasining 12-turida hamyurtimiz ertaga hindistonlik Vidit Santosh Gujrathi qarshi qora donalarda o‘ynaydi. Bu sportchi 6,5 ochko bilan jadvalda 5-o‘rinni egallab turibdi.
