Айни пайтда Фарғона вилоятида вилоят ҳокими кубоги мусобақаси ўзининг қизғин палласига кирган. Мусобақа ғолиблиги учун турнир иштирокчилари ҳар бир ўйинда ўзининг бор кучини ишга солиб, ғалабани қўлга киритишга ҳаракат қилмоқда.

Кеча мазкур мусобақанинг ярим финал баҳсида Олтиариқ туманининг «Нефтчи-Олтиариқ» ва Ёзёвон туманининг «Ёзёвон» жамоалари ўзаро учрашишди. Мусобақа регламентига кўра гуруҳда биринчи ўринни олган жамоа финалга ўйнаш ҳуқуқини қўлга киритиш имкониятига эга бўлганлиги учун ўйин шиддатли ўтишини кутишаётган эди.

Бироқ Биринчи лига ҳадисини олган «Нефтчи-Олтиариқ» жамоаси бутун учрашув давомида рақибига ҳеч қандай имконият қолдирмади. Аввалги ўйинда Андижон ёшларини йирик 4:0 ҳисобида мағлубиятга учратган олтиариқликлар «Ёзёвон» жамоаси дарвозасини икки бор аниқ нишонга олишга муваффақ бўлди. Хусусан, ўйиннинг 35-дақиқасида белгиланган жарима тўпини Ғиёс Турсунов аниқ амалга ошириб рақиб дарвозасини ишғол қилган бўлса, 77-дақиқага келиб Саид Эргашев қайчи услубида тўпни дарвоза тўрига ҳисобни 2:0 кўринишига олиб келди. Мазкур ғалаба «Нефтчи-Олтиариқ» жамоасига тўғридан-тўғри финал ўйинида иштирок этиш имкониятини берди.

— Мусобақа аввалида биз ўз олдимизга мазкур кубок баҳсининг финал босқичига чиқишни мақсад қилгандик. Бугун ушбу мақсадимизга эришдик, — дейди «Нефтчи-Олтиариқ» клуб раҳбари Дилмурод Муҳаммеджонов. — Финал ўйинида бизга ким рақиблик қилишидан қатъий назар чиройли ўйин кўрсатиб, совринни қўлга киритишга ҳаракат қиламиз. Айни пайтда жамоамизда йиғинлар давом этмоқда. Биз бу йиғинларга барча истеъдодли футболчиларни жалб этишга ҳаракат қиляпмиз. Шуни алоҳида айтиб ўтмоқчиманки, умидли ёшлар учун эшигимиз доимо очиқ.

Маъмур Зоидов