“Насаф” жамоаси Туркиядаги йиғинилари давомида назорат учрашувлари ўтказаётганидан хабарингиз бор. Жамоанинг навбатдаги рақиби – Молдовиянинг “Академия” жамоаси ҳисобланади. Ушбу навбатдаги назорат учрашуви 11 февраль куни ўтказилиши мулжалланган.
Молдовиянинг Кишинев шаҳри “Академия” жамоаси ҳақида тўхталадиган бўлсак, жамоа Молдовия футболида ташкил этилиши ва таркиби жиҳатидан ҳам энг ёш жамоа ҳисобланади, таркибдаги ўйинчиларнинг ўртача ёши 20-21 ёшни ташкил қилади. Улар 2008 йилдан бўён Молдовия миллий дивизионида иштирок этиб келмоқда. Жамоа таркибида биронта ҳам легионер йўқ.
Умумий маълумотлар:
Тўлиқ номи: “Академия УТМ” (Кишинев шаҳри, Молдовия)
Ташкил бўлган йили: 02.06.2006 йил
Бош мураббийи: Владимир Кныш
Стадиони: Динамо, Кишинев (сиғими 2692 ўрин)
Либоси: кўк (асосий), оқ (меҳмонда)
Энг юқори ютуғи: 2009/10 мавсумда 7-ўрин
Молдовия миллий дивизионида жами 12та жамоа иштирок этади. Чемпионат уч даврадан иборат. Ҳозирги пайтда “Академия” жамоаси 20 турдан сўнг 29 очко тўплаб, турнир жадвалининг 5-поғонасини банд этиб турибди. Рақиблар дарвозасига 35та гол киритиб, ўз дарвозаларидан 34 марта тўп олиб чиқишган.
Молдовия ёшлар терма жамоасининг асосини ҳам айнан “Академия УТМ” жамоаси ўйинчилари ташкил қилишади. Ушбу клубнинг олиб бораётган трансфер сиёсатининг яна бир жиҳати шуки, улар клубга фақат маҳаллий ёшларни жалб қилади ва кўзга кўринган яхши ўйинчиларини эса Россия ва Руминияга трансфер қилишади. Таркибига легионерларни таклиф қилишмайди. Яна бир қизиқ маълумот, “Академия УТМ” асосий таркибида 15 ва 16 ёшли футболчилар ҳам фаолият олиб боришмоқда.
Рақиб қандай бўлишидан қатъий назар, учрашувларни ўтказишдан асосий мақсад жамоанинг ўйин амалиётини оширишга қаратилган. Биз барча мухлислар номидан "Насаф" жамоасига омад тилаб қоламиз.
